一般足球員二十歲出道，二十五歲高峰，三十歲開始下坡，前鋒三十三歲開始諗退休，中場遲多一兩年，後衛又可以遲多年，龍門最老退休，近年去到保方咁成四十二歲都仲有得坐下後備。
今日日本職業聯賽，即係國內最高級別比賽，橫濱對前鋒嘅陣容入面，我哋仲可以搵到一個四十二歲嘅中場，中村俊輔。
身為近年日本黃金二代最有影響力嘅中場指揮官，當年挾住前輩中田英壽同名波浩嘅光環，成為近三十年第三批到意大利效力嘅日本球員。短暫嘅里賈納生涯後轉到蘇格蘭些路迪，發光發亮幾年之後，今日喺家鄉依然可以以四十二歲高齡出任最高水平競技入面嘅正選，係咪好勁？
上面有講佢係近三十年第三代留洋意國嘅日本球員，中田英壽係第二代，咁一代喺邊？
第一代就係中村俊輔隔離，今年五十三歲嘅永遠日本足球國寶 - 三浦知良。
94年巴西學法之後效力過意甲熱那亞，回國後聯同瑠瑋、北澤豪、柱谷哲二等等國家隊隊友打造川崎讀賣王朝，直到1998年法國世界盃被小野伸二取代入選資格後慢慢淡出鎂光之下，但因為熱愛自己嘅專業，一直堅持職業生涯直到今日2020年。
兩位值得尊敬嘅球員，
更值得尊敬嘅仲有佢哋領隊，
咁像排陣真係好有「愛回家」嘅感覺，
好似我當年玩FM買三十六歲碧咸返韋斯咸場場正選一樣。
Search